Qrenlandiya buzlarının əriməsi növbəti 50 ildə dünya okeanının səviyyəsinin 27 santimetr yüksəlməsinə səbəb ola bilər.

İqlimşünaslar Qrenlandiyada buz örtüyünün əriməsinin dəniz səviyyəsinin fəlakətli yüksəlməsinə səbəb olacağını və əhalinin sıx məskunlaşdığı sahil ərazilərinə təsir edəcəyini proqnozlaşdırıblar. Araşdırmanın nəticələri “Nature Climate Change” jurnalında dərc olunub. Elmi iş haqqında qısa məlumat Phys.org saytındakı press-relizdə təsvir edilib.

Alimlər cari nəzəri modelləri təkmilləşdirmək üçün son iki onillikdə Qrenlandiyada buz təbəqəsindən əldə edilən müşahidə məlumatlarını təhlil ediblər. Bu araşdırmanın nəticəsinə əsasən, gələcəkdə atmosferin çirklənməsindən asılı olmayaraq, Yer kürəsi o qədər istiləşəcək ki, Qrenlandiyanın buz təbəqəsi öz həcminin 3,3 faizini itirəcək və dəniz səviyyəsi təxminən dörddə bir metr və ya 27,4 santimetr yüksələcək.

Ehtimal olunur ki, əksər buzlaqlar 2100-cü ilə qədər əriyəcək və dəniz səviyyəsinin yüksəlməsi ilə bağlı hazırkı modelləşdirilmiş proqnozlar bu əsrdə riskləri az qiymətləndirir. Lakin bu, iqlim dəyişikliyi ilə bağlı yalnız aşağı həddir və antropogen emissiyalar davam edərsə, ssenari daha da pisləşəcək.

Buz təbəqəsinin yuxarı hissələri hər il qar yağması nəticəsində kütlə qazanır, lakin 1980-ci illərdən bəri buz qalxanı səthinin əriməsi və digər proseslər nəticəsində qazandığı buzdan daha çox buz itirir. 2012-ci ildə müşahidə olunan buzlaqların sürətlə əriməsi hər il təkrarlanarsa, dünya okeanının səviyyəsinin qalxması təxminən 78 santimetr ola bilər.