Fransada seçkilərin ikinci turundan sonra heç bir blok parlamentdə mütləq əksəriyyəti (289 yer) əldə etməyib.

İlkin məlumatlara görə, parlamentdə ən çox yeri (175-dən 205-ə qədər) “Yeni Xalq Cəbhəsi” solçu bloku qazanıb. Emmanuel Makronun koalisiyası ikinci yerdədir (150-dən 175 mandata qədər). Marin Le Penin “Milli Birlik” partiyası üçüncü yeri tutur (115-dən 150-yə qədər).

Seçkilərin ikinci turunda qeyri-adi dərəcədə yüksək fəallıq müşahidə olunub. Saat 12:00-da seçici fəallığı 26,63% təşkil edib - bu birinci raunddakı göstəricidən yüksəkdir. Saat 17:00-a qədər seçici fəallığı 59,71% qədər qalxıb, bu da 1981-ci ildən bəri ən yüksək göstəricidir. İyunun 30-da keçirilən birinci turda saat 17:00-a olan seçici fəallığı daha az olub - 59,39%.

Günün sonuna qədər seçici fəallığı 67,1% təşkil edib - birinci turda bu göstərici 66,71% idi.

İyunun 9-da Avropa Parlamentinə keçirilən seçkilərdə Marin Le Penin  “Milli Birlik” partiyasının qələbəsindən sonra Fransa prezidenti Emmanuel Makron milli assambleyanın buraxıldığını və növbədənkənar seçkilərin təyin edildiyini açıqlayıb. 76 deputatın seçildiyi birinci tur iyunun 30-da baş tutub. Birinci turda “Milli Birlik” partiyası 33,4% səslə qalib gəlib. İkinci yeri “Yeni Xalq Cəbhəsi”, üçüncü yeri isə hazırkı prezident Emmanuel Makron tərəfdarlarının koalisiyası tutub.

Birinci turdan sonra solçu partiyalar və Makron tərəfdarlarının koalisiyası seçiciləri qalanların ətrafında cəmləşdirmək və “Milli Birlik” partiyasının qalib gəlməsinin qarşısını almaq üçün öz dairələrində üçüncü yeri tutan 200-dən çox namizədi geri çağırıb. İkinci turda daha 501 deputat öz yerini tutacaq.