Gəncə Ağır Cinayətlər Məhkəməsinin inzibati binasında təqsirləndirilən şəxslərin saxlanıldığı otaqda dustaqlar arasında dava baş verib.

Buta.media-nın məlumatına görə, BAKU.WS-in bölgə müxbiri xəbər verir ki, davada iştirak edən şəxslər mərhum "qanuni oğru" Rövşən Lənkəranski və Lotu Qulinin adamları olub. 

Davanın 8 nəfərin iştirakı ilə baş verdiyi məlum olub. 

Tərəflər arasında mübahisəyə səbəb Göygöl rayonu, Yeni Qızılca qəsəbəsində baş vermiş qətl hadisəsi olub. Həmin cinayət hadisəsinin məhkəmə prosesi zamanı tərəflər münasibətləri aydınlaşdırmağa çalışıb. 

Report-un məlumatına görə, hadisə zamanı Cinayət Məcəlləsinin 126-cı (Qəsdən sağlamlığa ağır zərər vurma) maddəsi ilə məhkəməsi olan Həbib Əliyev həmyerlisi, Cinayət Məcəlləsinin 29.120-ci (Qəsdən adam öldürməyə cəhd) maddəsi ilə məhkəməsi olan Fazil Mustafayevi döyərək ona xəsarət yetirib.

Hadisə zamanı otaqda olan narkotik maddələrin qanunsuz dövriyyəsi maddəsi ilə məhkəməsi olan Ağstafa rayon sakini 1989-cu il təvəllüdlü Tural Fərəcov da xəsarət alıb.

Faktla bağlı araşdırma aparılır.