Bu gün Ankarada səfərdə olan ABŞ dövlət katibi Entoni Blinkenlə Türkiyənin XİN rəhbəri Hakan Fidan arasında görüş keçirilib. 

Danışıqlardan əvvəl Hakan Fidanın Entoni Blinkeni qarşılaması zamanı maraqlı an yaşanıb.

Belə ki, Blinken Hakan Fidanı qucaqlayaraq görüşmək istəsə də, Türkiyənin XİN rəhbəri onun bu jestinə cavab olaraq həmkarı ilə əllə salamlaşmağa üstünlük verib.

Bununla yanaşı, Blinkenin dünən gecə saatlarında Ankarada hava limanında qarşılanması da medianın diqqətini çəkib. Türkiyə mediası yazır ki, tarixdə ilk dəfə olaraq ABŞ dövlət katibi yüksəkvəzifəli türkiyəli şəxs olmadan qarşılanıb. Blinkeni Esenboğa hava limanında ABŞ-nin Türkiyədəki səfiri Jeffry Flake, Ankara valisinin müavini Namık Kemal Nazlı və digərləri qarşılayıb. Görüntülərdə ərazidə işıqların yandırılmaması da əks olunub. Xarici media Blinkenin bu formada qarşılanmasını onun Fələstin-İsrail münaqişəsinə yanaşması ilə əlaqələndirib.