Ali Məhkəmə keçmiş baş nazir və müxalif “Ədalət uğrunda hərəkat” partiyasının lideri İmran Xanı girov müqabilində azad edib.

Bu barədə İslamabad Ali Məhkəməsinin qərarında bildirilir.

Qeyd edək ki, dünən Pakistan Ali Məhkəməsi İmran Xanın həbsi ilə bağlı qərarı qanunsuz elan edib və siyasətçinin dərhal azadlığa buraxılması barədə qərar verib.

Pakistanın keçmiş baş naziri İmran Xan vəzifədə ikən xarici liderlərdən aldığı bahalı hədiyyələrin satışında ittiham olunur. Bundan əlavə, Pakistan polisi Xana qarşı terrorla mübarizə qanununu pozduğuna görə də ittiham irəli sürüb.
İmran Xan mayın 9-da saxlanılandan bəri ölkədə etiraz aksiyaları başlayıb. Bununla əlaqədar olaraq Daxili İşlər Nazirliyinin tələbi ilə Pəncab əyalətində hərbi qüvvələr yerləşdirilib, həmçinin ölkə daxilində mobil internet xidmətləri dayandırılıb, məktəblər və yollar bağlanıb. Son məlumatlara görə, aksiyalarla əlaqədar 1000-ə yaxın adam həbs edilib.