Ukrayna hakimiyyəti ABŞ-dan Kiyevin kasetli sursatlar daxil olmaqla hərbi yardımı genişləndirməyi xahiş edib. 

Bu barədə “Reuters” agentliyinə ABŞ Nümayəndələr Palatasının Silahlı Qüvvələr Komitəsinin konqresmenləri Ceyson Krou və Adam Smit bildiriblər.

Onların sözlərinə görə, Kiyev əvvəllər tələb etdiyi 155 mm-lik kasetli artilleriya sursatlarına əlavə olaraq MK-20 kaset bombaları da istəyib. MK-20 adətən təyyarədən atılır, hər bir belə bomba havada genişlənir və 240-dan çox sursat buraxır.

Agentliyin məlumatına görə, Ukrayna qoşunları pilotsuz təyyarələrdən düşmən qüvvələrinə bütün bombanı deyil, yalnız onun sursatlarını atmağa hazırlaşır. 

Ukrayna bu bombalar və ikiməqsədli təkmilləşdirilmiş artilleriya sursatları ilə (Dual-Purpose Improved Conventional Munitions, DPICM) ölkənin şərqində Rusiya ilə döyüşlərdə üstünlük əldə etməyə ümid edir. Digər məsələlərlə yanaşı, Kiyev kasetli sursatları Ukrayna mövqelərinə hücum etmək üçün dalğalar şəklində əsgər göndərən RF qoşunlarının hücumlarına qarşı mübarizə üsulu hesab edir.

Krou və Smit iddia edirlər ki, fevral ayında Münhen Təhlükəsizlik Konfransında Ukrayna rəsmiləri ABŞ rəsmilərini kaset sursatlarının ötürülməsi üçün lobbiçilik etməyə çağırıblar.