2022-ci ilin sonunda Hindistanın əhalisi 1,417 milyard olub, bu da Çindən beş milyon çoxdur. Bu barədə “Bloomberg” nəşri “World Population Review”in məlumatlarına istinadən xəbər verir.

Yanvarın 17-də Çin hakimiyyəti 1960-cı ildən ilk dəfə ölkə əhalisinin 2022-ci ildə əvvəlki illə müqayisədə 850 min nəfər azaldığını açıqlayıb. Çin Xalq Respublikasının Milli Statistika Bürosunun məlumatına görə, ölkədə 1,411 milyarddan çox insan yaşayır.

Dünya Əhali İcmalı Hindistan əhalisinin 18 yanvar tarixinə 1,423 milyard nəfərə çatdığını təxmin edir. Digər araşdırma təşkilatı “Macrotrends” Hindistanda 1,428 milyard insanın yaşadığını iddia edir.

Hindistan rəsmi olaraq son əhali rəqəmlərini açıqlamayıb. Hər on ildən bir ölkədə əhalinin siyahıyaalınması keçirilir, lakin 2021-ci ildə koronavirus pandemiyası səbəbindən təxirə salınıb. BMT Hindistanın 2023-cü ilin sonunda əhalinin sayına görə Çini keçəcəyini proqnozlaşdırıb.

“Bloomberg” qeyd edir ki, Hindistan əhalisinin yarısı 30 yaşdan aşağıdır. Təxminən 800 milyon insan hökumətdən pulsuz yemək alır ki, bu da dünyada ən böyük proqramdır.

2022-ci ilin noyabr ayında dünya əhalisi, BMT-nin məlumatına görə, səkkiz milyard nəfərə çatıb. Təşkilatın hesabatına görə, dünya əhalisini bir milyard artırmaq üçün 12 il lazım olub.