Krasnodar diyarının Ust-Labinski rayon məhkəməsi əvvəllər hədə-qorxu ilə pul tələb etməkdə təqsirli bilinən kriminal avtoritet Zaxari Kalaşovun (Şakro Molodoy) şərti azadlığa buraxılması barədə qərar qəbul edib. Bu barədə TASS-a məhkəmənin mətbuat xidmətindən məlumat verilib.

“Məhkəmə Kalaşov Z.K.-nin şərti azadlığa buraxılması barədə vəsatətini təmin etdi. Bu vəsatət üzrə məhkəmə iclası bu gün bağlı qapılar arxasında keçirilib”, - deyə məhkəmə nümayəndəsi bildirib.

70 yaşlı Zaxari Kalaşov səhhətinə görə vaxtından əvvəl azadlığa buraxılmasını istəyib.

2018-ci ilin martında Şakro Molodoy iki hədə-qorxu ilə təqsirli bilinərək, demək olar ki, on il müddətinə azadlıqdan məhrum edilib: Moskvanın Roçdelskaya küçəsindəki “Elements” kafesinin sahibi Janna Kimdən səkkiz milyon rubl və “Nordneftegaz” MMC-nin baş direktoru Lev Qaramovdan 10 milyon rubl. Cinayətkar 2016-cı ilin yayında saxlanılıb.

Şakro Molodoy (əsl adı Zaxari Kalaşov) ən məşhur kriminal bosslardan biridir. “Novaya qazeta”nın məlumatına görə, o, 1971-ci ildə 21 yaşında qanuni oğru olub. 2013-cü ildə kriminal bos Ded Xasanın (Aslan Usoyan) öldürülməsindən sonra Şakro Molodoy “Rusiyada 1 nömrəli qanun oğru” adlandırılıb.