“Yeni Qalaaltı Hotel Company” MMC-nin əməkdaşlarının qanunsuz əməlləri ilə bağlı cinayət işi məhkəməyə göndərilib.

Baş Prokurorluğa xəbər verir ki, Şabran rayonunda fəaliyyət göstərən “Yeni Qalaaltı Hotel Company” MMC-yə məxsus pul vəsaitlərinin mənimsənilməsi ilə bağlı cinayət işinin ibtidai istintaqı tamamlanıb.

Rayon prokurorluğunda aparılan istintaqla cəmiyyətin işçiləri Seyfəddin Cəfərli və Ehtiram İbrəhimovun qabaqcadan əlbir olan bir qrup şəxs halında onlara etibar edilən MMC-yə məxsus 2 ədəd “Hyundai County” markalı avtobusları ümumilikdə 121 min 400 manata sataraq əldə olunan pul vəsaitlərini ələ keçirmələrinə əsaslı şübhələr müəyyən edilib.

Seyfəddin Cəfərli və Ehtiram İbrəhimov Cinayət Məcəlləsinin 179.3.2-ci (külli miqdarda mənimsəmə) maddəsilə təqsirləndirilən şəxs qismində cəlb olunaraq barələrində məhkəmənin qərarı ilə həbs qətimkan tədbiri seçilib və cinayət işi baxılması üçün Sumqayıt Ağır Cinayətlər Məhkəməsinə göndərilib.

İbtidai istintaq zamanı MMC-yə vurulmuş ziyanın 75 min manat hissəsinin ödənilməsi təmin edilib.