Avropa Çempionatının 1/8 final mərhələsində “bozqurd” işarəsi göstərdiyi üçün cəzalandırılan Türkiyə millisinin futbolçusu Merih Demiralın heykəli ucaldılıb.

Bu barədə “Habertürk”ə istinadən xəbər verir.

Heykəlin yerləşdiyi Bolu şəhərinin Karaçayır məhəlləsində açılış mərasimi baş tutub. Tədbirdə Bolu Bələdiyyə Başçısı Tanju Özcan, qonaqlar və vətəndaşlar iştirak edib.

Merih sosial media hesabında paylaşım edərək təşəkkürlərini çatdırıb.

Qeyd edək ki, “bozqurd” işarəsi göstərən Merihin heykəlini ucaldacağına da söz verən Özcan, “Gəlsin Avropa məni də cəzalandırsın” demişdi.

Xatırladaq ki, Türkiyə yığmasının Avropa Çempionatında Avstriya ilə qarşılaşmasında dubl edərək qələbədə böyük pay sahibi olan futbolçu qol sonrasında “bozqurd” işarəsi göstərmişdi.

Siyasi jest kimi qiymətləndirilən bu addıma görə Merihə 2 oyunluq cəza verilmişdi.