Rusiya XİN rəhbərinin müavini Mixail Qaluzin RBK nəşrinə müsahibəsində RF sülhməramlılarının Azərbaycanın Qarabağ bölgəsində qalmasının aktual olduğunu bəyan edib. Onun fikrincə, “münaqişə vəziyyətində son nöqtə hələ qoyulmayıb”.
Qarabağın bir çox sakininin könüllü olaraq bölgəni tərk etmək qərarına gəlməsinə baxmayaraq, Qaluzin əmindir ki, Rusiyanın sülhməramlı missiyasına hələ də tələbat var. O, həmçinin Rusiya, Azərbaycan və Ermənistan arasında nəqliyyat və iqtisadi inteqrasiya, sərhədlərin delimitasiyası, sülh müqaviləsinin imzalanması və iki ölkə arasında əlaqələrin qurulması məsələləri ilə bağlı üçtərəfli sazişlərin əhəmiyyətini vurğulayıb.
“Bütün bunlar münasibətlərin normallaşması üçün qarşılıqlı məqbul şərtlərə səbəb olmalıdır”, - deyə o bildirib
Qaluzin həmçinin Rusiya sülhməramlı kontingentinin Qarabağ ermənilərinin nümayəndələri ilə Azərbaycan hakimiyyəti arasında təmasların aparılmasında rolunu vurğulayıb və regionda sabitliyin təmin edilməsi üçün onların davamlı iştirakının zəruriliyini bildirib.
Bundan əlavə, Qaluzin qeyd edib ki, Zəngəzur dəhlizinin açılması “Zaqafqaziyada ümumi sabitləşmənin mühüm amilinə” çevriləcək.
“Bu, bütün Transqafqaz dövlətlərinin iqtisadi inkişafına töhfə verəcək, çünki bu halda Ermənistanın nəqliyyat-logistika mərkəzinə çevrilmək, Azərbaycan, Türkiyə və Rusiya ilə nəqliyyat əlaqələrini gücləndirmək və genişləndirmək imkanı olacaq. Azərbaycan ölkənin iki bölgəsi arasında fasiləsiz ritmik nəqliyyat əlaqəsinə malik olmaq imkanı əldə edəcək. Zaqafqaziyada vəziyyətin ümumi sabitləşməsi isə gələcək üçün Ermənistan və Azərbaycan arasında etimad əsaslarının möhkəmlənməsinə xidmət edəcək”, - deyə Rusiya Federasiyası xarici işlər nazirinin müavini qeyd edib.
Qaluzin oktyabrın 12-də Bişkekdə MDB sammiti çərçivəsində Rusiya Federasiyası, Azərbaycan və Ermənistan xarici işlər nazirləri arasında danışıqların aparılmasının mümkünlüyünü açıqlayıb.
“Azərbaycan tərəfi artıq prinsipial razılığını verib. Və biz gözləyirik ki, Ermənistan tərəfi də bu məsələyə məsuliyyətlə yanaşacaq və belə danışıqlarda iştiraka razı olacaq”.
