Pentaqon Polşanın NATO-nun Almaniyadakı bazasından Ukraynaya MiQ-29 qırıcılarının təhvil verilməsi təklifinə qarşı çıxıb, Reuters yazır.

Pentaqonun sözçüsü Con Kirbi bildirib ki, Birləşmiş Ştatlar Ukraynaya silahların çatdırılmasını sürətləndirməyə çalışır, lakin döyüş təyyarələrinin NATO ərazisindən müharibə zonasına köçürülməsi perspektivi “bütün NATO bloku üçün ciddi narahatlıq yaradır”. "Bunun üçün əsaslı məntiqin olub-olmaması bizə aydın deyil" dedi Kirbi.

Martın 8-də Polşa Xarici İşlər Nazirliyi MiQ-29 qırıcılarını Almaniyadakı Ramşteyn aviabazasına təhvil verməyə və onları ABŞ-ın sərəncamına verməyə hazır olduğunu bəyan edib. Polşa oxşar təyyarələri olan digər NATO üzvlərini də eyni şeyi etməyə çağırıb. Dövlət Departamenti bildirib ki, Polşa tərəfi bu “gözlənilməz addımı” Vaşinqtonla razılaşdırmayıb.

Con Kirbi qeyd edib ki, Polşaya məxsus təyyarələrin Ukraynaya ötürülməsi ilə bağlı qərarı Polşa hökuməti verir.