Qazaxıstanda Astana-Petropavlovsk avtomobil yolunda 95 nəqliyyat vasitəsinin iştirakı ilə ağır qəza baş verib.

Yerli KİV-in məlumatına görə, qəzada iştirak edən 24 avtomobil çıxarılıb, daha 30 avtomobil isə hadisə yerini özbaşına tərk edib.

Qəza yerli vaxtla saat 13:30 (Bakı vaxtı ilə 12:30) radələrində Astana-Şuçinsk magistralının Qazaxıstanın Akmola vilayətinin Petropavlovska gedən hissəsində baş verib. Hadisə nəticəsində 12 nəfər xəsarət alıb və rayon xəstəxanasına çatdırılıb. Daha 15 nəfər Akkol şəhərindəki isinmə mərkəzlərində yerləşdirilib.

Qazaxıstan Səhiyyə Nazirliyinin məlumatına görə, 20 nəfər xəsarət alıb, onlardan 11-i, o cümlədən üç uşaq xəstəxanaya yerləşdirilib, vəziyyəti orta ağırdır.