Dağıstan Müftiliyi yaxın vaxtlarda Respublikada niqab geyinməyi qadağan edən fətva verəcək. Bunu Dağıstanın müftisi Əhməd-Əfəndi Abdulayev deyib. Onun sözlərini respublika rəhbərinin administrasiyası sitat gətirir.

“Burada tez-tez niqab məsələsi qaldırılır. <…> Rusiyanın hər yerindən gələn bütün dindarlar bu suala cavab verməmək üçün ehtiyatlı davranırlar, mən isə bu suala cavab vermək qərarına gəldim. <…> Bu gün əməkdaşlarımız bunun üzərində işləyir, biz niqabın qadağan edilməsinə fətva verəcəyik. <…> Yalnız bir həqiqət olacaq. Quranda deyilir: bir həqiqət var, digərləri yanlışdır”, - Abdulayev bildirib.

O əlavə edib ki, fətva “bu axşam və bir-iki günə” veriləcək.

Mayın sonunda Rusiya Prezidenti yanında İnsan Hüquqları Şurasının (İHŞ) rəhbəri Valeri Fadeyev bildirib ki, RF ərazisində niqab geyinməyə qadağa qoyulmalıdır. O, bu fikri “Parlament” qəzetinə müsahibəsində “ekstremizmin riskini artıran amilləri”ndən danışarkən səsləndirib.

Niqabın qadağan edilməsi təklifini Rusiya İstintaq Komitəsinin sədri Aleksandr Bastrıkin dəstəkləyib. Onun sözlərinə görə, bunu “təcili” etmək lazımdır. “Dövlət Dumasının vəzifəsi sizin danışdığınız geyimi qadağan edən qanun qəbul etməkdir. Orada [Mərkəzi Asiya ölkələrində] niqab qadağandır, amma burada icazə verilir. Niyə? Bilmirəm, mən qanunverici deyiləm. Amma mən sizinlə razıyam, biz təcili olaraq bütün bunları qadağan etməliyik”, – Bastrıkin bildirib.

Bastrıkinin bəyanatı Dağıstanda silahlıların Dərbənd və Mahaçqalada pravoslav kilsələrinə və sinaqoqlara hücumu, habelə Rostov istintaq təcridxanasında insanların girov götürülməsi nəticəsində baş verən terror aktından qısa müddət sonra verilib. İstintaq Komitəsinin rəhbərinin qeyd etdiyi kimi, bu hücumlar “terrorçular, islamçılar” tərəfindən həyata keçirilib. Buna cavab olaraq Çeçenistan rəhbəri Ramzan Kadırov bildirib ki, bu cür bəyanatlarda “son dərəcə diqqətli olmaq lazımdır”. Onun fikrincə, “müsəlmanlar terror aktı törətməyiblər və törətmirlər”. O, Bastrikinin “bundan sonra İslamı terrorla müqayisə etməyəcəyinə” ümid etdiyini bildirib.