Mayın 19-da qəzaya uğrayan və göyərtəsində İran prezidenti İbrahim Rəisinin olduğu helikopter lazımi naviqasiya və siqnal avadanlığı ilə təchiz edilib. Helikopteri İslam İnqilabı Keşikçiləri Korpusu (SEPAH) yox, ordu pilotları idarə edirdi.
Bu barədə “Türkiyə” qəzeti İranın xüsusi xidmət orqanlarındakı mənbələrə istinadən məlumat yayıb.
Qəzetin mənbələrinin məlumatına görə, son anda helikopterin sərnişinləri siyahısına xarici işlər naziri Hüseyn Əmir Abdullahian və digər şəxslər də daxil edilib. Onlar əvvəlcə ikinci helikopterlə Azərbaycandan İrana uçmalı idilər.
Nəşrin məlumatına əsasən, əgər əvvəllər helikopteri SEPAH pilotları idarə edirdisə, bu dəfə ekipaj ordunun şəxsi heyətindən ibarət olub. Helikopterin özü üç növ izləmə cihazı ilə təchiz edilib. Standart GPS və transponderlə yanaşı, siqnalın 72 saat fasiləsiz ötürülməsini təmin edən xüsusi sistem quraşdırılıb. Lakin bütün bunlara baxmayaraq, qəza yerini dərhal tapmaq mümkün olmayıb.
