Fransa xüsusi təyinatlıların və digər hərbi birləşmələrin Ukrayna sərhədindən keçməsinə icazə vermək imkanını nəzərdən keçirir. Bu barədə Fransanın “Le Monde” qəzeti yazıb (məqaləni abunə ilə oxumaq olar).
Nəşr yazır ki, Ukraynada genişmiqyaslı müharibə başlayandan Ukraynada Qərb kəşfiyyat xidmətlərinin çoxsaylı məxfi agentləri var idi: diplomatlar, Ukrayna qərargahında yerləşdirilmiş “məsləhətçilər” və ya hər növ xüsusi təyinatlılar. “Bütün müttəfiq dövlətlər Ukraynadadır. Bunlar döyüş birləşmələri deyil, məsələn, orada bütün xüsusi xidmət orqanlarının nümayəndələri iştirak edirlər”, - Ukrayna diplomatik mənbəsi qəzetə bildirib.
Rəsmi Paris öz ordusunun Ukraynada olmasını inkar edir. “Le Monde” yazır ki, Ukrayna ərazilərində Fransa Xarici Təhlükəsizlik Xidmətinin Baş İdarəsinin (DGSE) əməkdaşları var, lakin “hətta onların bəzilərinin ölüm ehtimalı hal-hazırda inandırıcı şəkildə inkar edilə bilər”, qəzet qeyd edir.
Döyüşçüləri məxfi agent olmayan və Baş Qərargahın tabeliyində olan Fransa xüsusi təyinatlıları Ukrayna sərhədini keçmirlər - Ukrayna əsgərlərinə təlim keçmək və ya silah təchizatına nəzarət etmək üçün qonşu ölkələrə gedirlər. “Lakin indi fransız düşüncəsinin mərkəzində hərbi təlimçilərin potensial olaraq digər şərti birliklərlə birgə Ukrayna sərhədini keçməsinə icazə vermək ideyası dayanır”, “Le Monde” yazır.
Nəşr qeyd edir ki, bu variant qoşunların kütləvi şəkildə yerləşdirilməsini nəzərdə tutmur və hər şeydən əvvəl Rusiyanı “strateji dilemma” qarşısında qoymaq üçün bir vasitə hesab olunur. “Le Monde” təklif edir ki, Fransa və ya digər ölkələrin əsgərləri yerüstü hava hücumundan müdafiə obyektlərinə yerləşdirilə bilərlər ki, bu da potensial olaraq Ukraynanın bəzi ərazilərini təhlükəsiz edəcək və Rusiya ordusunun zərbələrini ciddi şəkildə məhdudlaşdıracaq. Həmçinin bu addımın ABŞ-ın F-16 təyyarələri Ukraynaya yollayanda onların təhlükəsizliyini təmin etməyə kömək ola bilər.
“Le Figaro” qəzetinin məlumatına görə, Fransa prezidenti Emmanuel Makron martın 7-də Fransadakı bütün siyasi qüvvələrlə görüş keçirərək Ukraynaya mümkün quru qoşunlarının göndərilməsini müzakirə edəcək. Yelisey sarayı parlamentdə təmsil olunan partiyaların liderlərinə dəvət göndərib.
► Fevralın 26-da Fransa prezidenti Emmanuel Makron bəyan edib ki, Avropa ölkələri Rusiyanın Ukrayna ilə müharibədə qalib gəlməsinin qarşısını almaq üçün hər şeyi etməlidir. Eyni zamanda o etiraf edib ki, Qərb müttəfiqləri öz qoşunlarını Ukraynaya göndərə bilər, baxmayaraq ki, bu məsələdə hələlik konsensus yoxdur. “Financial Times” və “Bild” yazıb ki, bir sıra Qərb hərbi qulluqçuları artıq Ukraynadadır.
► Makronun bəyanatı Almaniya, İsveç, Polşa, İtaliya, həmçinin Böyük Britaniya, ABŞ və NATO da daxil olmaqla bir çox Aİ ölkələrində dəstəklənməyib. Fransanın xarici işlər naziri Stefan Sejurne “France Info”ya müsahibəsində bildirib ki, ölkə Ukraynaya öz qoşunlarını göndərmək niyyətində deyil.
► Avropa Komissiyası Ukraynaya qoşun yeridilməsi məsələsini “Aİ ölkələrinin məsuliyyəti və suveren qərarı” adlandırıb. Kreml bildirib ki, Avropadan Ukraynaya qoşun yeritmək Rusiya ilə NATO arasında birbaşa münaqişəni qaçılmaz edəcək.
