SSRİ hökumətinin keçmiş rəhbəri Nikolay Rıjkov 94 yaşında vəfat edib. Bu barədə Rusiya Federasiya Şurasının sədri Valentina Matvienko məlumat verib.

Nikolay Rıjkov 1974-1989-cu illərdə ölkənin nominal parlamenti olan SSRİ Ali Sovetinin deputatı olub. 1985-1991-ci illərdə SSRİ Nazirlər Sovetinin sədri işləyib. İstefa və təqaüdə çıxdıqdan sonra Rıjkov siyasi karyerasını davam etdirib. 1995-2003-cü illərdə Rusiya Federasiyası Dövlət Dumasının deputatı, daha sonra 20 il ərzində Federasiya Şurasında Belqorod vilayətindən senator vəzifəsində çalışıb. Rıjkovun senator kimi səlahiyyətlərinə 2023-cü il sentyabrın 25-də xitam verilib.

Nikolay Rıjkov senator kimi 2014-cü ildə Rusiya qoşunlarının Krıma daxil olmasını, həmçinin 2022-ci ildə Ukraynanın Donetsk, Luqansk, Xerson və Zaporojye vilayətlərinin ilhaqını dəstəkləyib. Avropa Birliyi, ABŞ, Ukrayna, Böyük Britaniya, Kanada, İsveçrə, Avstraliya və Yeni Zelandiyanın sanksiya siyahısına daxil edilib.