Ukraynanın Donetsk vilayətinin prokurorluğu Telegram kanallarında Rusiya hərbçilərinin yeddi ukraynalı güllələməsinə dair videonu araşdırmağa başlayıb.

Ukrayna Baş Prokurorluğunun məlumatına görə, istintaq müharibə qanunlarının pozulması maddəsi ilə aparılır.

Dron vasitəsi ilə çəkilmiş videogörüntülərdə bir neçə nəfərin, ehtimal ki, Ukrayna əsgərlərinin necə əsir götürüldüyü və sonra öldürüldüyü göstərilir. Kadrları yayan Ukraynanın “OSINT DeepState” layihəsi yazıb ki, videoda Ukrayna Silahlı Qüvvələrinin 92-ci ayrı-ayrı hücum briqadasının əsgərləri güllələnib.

Ukrayna prokurorluğu bildirib ki, video fevralın 24-də yayılmağa başlayıb. İdarədən qeyd ediblər ki, Rusiya əsgərləri Donetsk vilayətinin Baxmut rayonunun İvanovskoye və Xromovaye kəndləri arasında Ukrayna Silahlı Qüvvələrinin mövqelərinə basqın etdikdən sonra silahsız ukraynalı əsirləri öldürüblər.

“Təcavüzkar dövlətin hərbçiləri beynəlxalq humanitar hüquq normalarına məhəl qoymayaraq, yaralı və silahsız Ukrayna hərbçilərin həyatına qəsdən son qoyublar”, - Ukrayna Baş Prokurorluğu bildirib.

Ümumilikdə, ukraynalı müstəntiqlər 45 ukraynalı hərbi əsirin qətli ilə bağlı 19 cinayət işini araşdırırlar.