ABŞ hesab edir ki, İsrail hələ Qəzzada quru əməliyyat üçün ilkin plan hazırlamayıb. Bu barədə “The New York Times” yazır.

Nəşrin həmsöhbətlərinin sözlərinə görə, İDF komandanlığı bunun hədəfli hava zərbələri və xüsusi təyinatlı qrupların tətbiqi ilə əməliyyat olub-olmayacağını və ya tankların və piyadaların Qəzza zolağına yerləşdiriləcəyini hələlik müəyyən etməyib. Hər iki variant həm mülki şəxslər, həm də hərbçilər arasında itkilərə səbəb olacaq, lakin genişmiqyaslı əməliyyat zamanı itkilər daha çox olacaq.

Nəşrin mənbələri həmçinin göstərir ki, Amerika tərəfinin fikrincə, İsrail quru əməliyyat zamanı hansı konkret məqsədlərə nail olmaq istədiyini bilmir. Onların hesab edirlər ki, bu vəziyyət İsrailin Qəzzada əməliyyat keçirməyə hələ tam hazır olmadığı ilə bağlı narahatlıq doğurur.

Birləşmiş Ştatlar İsrail ordusuna məsləhət vermək üçün dəniz piyadaları korpusunun general-leytenantı Ceyms Qlinni İsrailə göndərib. Bununla belə, Pentaqon rəsmiləri vurğulayıblar ki, bu fakt ABŞ ordusunun İsrail Müdafiə Qüvvələrinin nə edəcəyinə qərar verməsi kimi şərh edilməməlidir.

Amerika media mənbələri bildiriblər ki, ABŞ və Avropa İttifaqı danışıqlar yolu ilə girovların azad edilməsinə nail olmaq üçün quru əməliyyatın başlanmasını təxirə salmağı xahiş edib. İsrail rəsmiləri ABŞ-ın quru əməliyyatla bağlı heç bir təzyiq göstərmədiyini bildirib.

Oktyabrın 7-də HƏMAS İsrailə hücum edib. Qəzza zolağı ilə sərhəddə yerləşən İsrail icmalarına daxil olan terrorçular yüzlərlə sakini öldürüb, girov götürüblər. Buna cavab olaraq İsrail Qəzza zolağına zərbələr endirməyə başlayıb.