Gürcüstanda hakim “Gürcü Arzusu” partiyası prezident Salome Zurabişvilinin hökumətlə razılaşdırılmayan Aİ ölkələrinə səfərlərinə görə ona qarşı impiçment proseduruna başlayır. Bu barədə siyasi partiyanın sədri İrakli Kobaxidze məlumat verib.

“Partiyanın siyasi şurasında prezidentin impiçmenti proseduruna başlamaq qərarına gəldik”, - Kobaxidze brifinqdə deyib.

Bundan əvvəl Gürcüstan hökuməti Zurabişvilinin Almaniya, Ukrayna, İsrail və Birləşmiş Ərəb Əmirlikləri də daxil olmaqla on dövlətə xarici səfərlərini rədd edib.

Prezident administrasiyası bildirib ki, Zurabişvili Gürcüstanın dekabrda alacağını gözlədiyi Aİ-yə namizəd statusuna dəstək tapmaq üçün avqustun 31-dən başlayaraq Avropa liderləri ilə görüşlərə başlayıb. Zurabişvili Avropa turnesinə Almaniyadan başlayıb.

“Gürcü Arzusu”nun icraçı katibi Mamuka Mdinaradze deyib ki, Zurabişvili hökumətin razılığı olmadan Avropa ölkələrinə xarici səfərlər edir ki, bu da konstitusiyanı pozur. Onun sözlərinə görə, hökumətin bunun üçün müəyyən səbəbləri var. Xüsusilə, prezidentin parlamentdəki son çıxışı “Gürcüstanın Avropaya inteqrasiyasının əleyhinə” kimi qiymətləndirilib.