Rusiya prezidenti Vladimir Putinin anası olduğunu iddia edən Vera Putina Gürcüstanda 97 yaşında dünyasını dəyişib. Mtavari telekanalının məlumatına görə, qadın mayın 30-da Gürcüstanın şərqindəki Xəzər bələdiyyəsinin Metexi kəndində dəfn edilib.
Vera Putina 1926-cı ildə Perm vilayətinin Oçerski rayonunun Terexino kəndində anadan olub. Onun sözlərinə görə, evli bir kişidən uşağı olub - Vova Putin.
Daha sonra qadın gürcü ilə ailə qurub və oğlu ilə birlikdə Metexiyə köçüb. O, ögey atasının Vova ilə pis davrandığını deyib. Nəticədə qadın oğlunu Rusiyaya valideynlərinin yanına göndərib və o vaxtdan onu görməyib. Vera Putina Vladimir Putini televiziyada görən kimi Vovasını dərhal tanıdığını iddia edib.
Bu versiyanın tərəfdarları olan jurnalistlər Putinin uşaqlığı haqqında real məlumatların çox az olduğuna diqqət çəkiblər. Metexi kəndinin sakinləri isə bu hekayəni müzakirə etməyi çox sevirlər.
Məsələn, kənddə deyirdilər ki, bir müddət qadına mühafizə tapşırılıb, guya ondan hətta DNT testi də götürüblər. İddia olunurdu ki, xüsusi xidmətlər oğlunun bütün köhnə fotolarını və sənədlərini Veradan götürüblər.
“Putinin ilk seçkilərindən əvvəl “Sovershenno Sekretno” holdinqinin prezidenti Artem Borovik məlumat vermişdi ki, Putinin uşaqlıq hekayəsi tezliklə dərc olunacaq. 2000-ci il martın 9-da Artyom Borovik və Ziya Bajaev Şeremetyevoda Borovikin şəxsi təyyarəsi partladılması nəticəsində ölüblər.
Elə həmin gün, martın 9-da, Vera Putina ilə tanış olmaq üçün Gürcüstanda gözləyən jurnalistlər üçün böyük ziyafət təşkil edilib, lakin ziyafətdən sonra onları dərhal avtobusa mindirib geri yola salıblar.
Nəhayət, bu faktları toplayıb kitab yazan Vaxa İbrahimovu da öldürüblər. Yəni bu böyük sirrə gedən yolda artıq üç cəsəd var.
Başqa bir sual: əgər Vladimir Putin Sankt-Peterburqda doğulubsa, niyə onun uşaqlıq fotoları yoxdur, niyə onu 8 yaşına qədər tanıyanlar yoxdur? Bunu mən də daxil olmaqla, Putinin həmkarları da deyirlər”, - polşalı yazıçı və jurnalist Kristina Kurçab-Redliç 2013-cü ildə “Azadlıq” radiosuna danışıb.
Bu nəzəriyyəyə sadiq qalan başqa bir jurnalist, italyan Antonio Russo 2000-ci il oktyabrın ortalarında Tbilisidə öldürülüb.
“Moskovski komsomolets” 2006-cı ildə yazırdı ki, faciədən bir qədər əvvəl jurnalist “Radicale” radiosunun redaksiyasına Putinin Gürcüstanda doğulduğunu və onun anasının hələ də yoxsulluq içində yaşadığı ilə bağlı videokaset verib. İtaliya qəzetləri jurnalistin ölümünün Ziya Bajaev və Artem Borovikin ölümü ilə bağlı ola biləcəyini istisna etməyiblər.
Son illər Vera Putina jurnalistlərlə ünsiyyət qurmayıb. 2022-ci ildə “Formula” telekanalı onun xəstə olduğunu və yaxınları tərəfindən Tbilisiyə köçürüldüyünü bildirib.
Rusiya prezidentinin rəsmi bioqrafiyasına görə, Putin 1952-ci il oktyabrın 7-də Leninqradda anadan olub. Atası Vladimir Spiridonoviç Putin (1911-1999), anası Putina (Şelomova) Mariya İvanovnadır (1911-1998).
