Rusiya Federasiyası Təhlükəsizlik Şurası rəhbərinin müavini Dmitri Medvedev nüvə dövlətinin prezidentinin Beynəlxalq Cinayət Məhkəməsində (BCM) mühakimə olunması cəhdlərinin beynəlxalq hüquq üçün “ağır nəticələrə” səbəb olacağını bildirib. O, öz Telegram kanalında Haaqa məhkəməsi tərəfindən Vladimir Putinin həbsinə dair orderi şərh edib.

Medvedev yazıb ki, Rusiya bu hərəkətlərə BCM-in binasına raket hücumu ilə cavab verə bilər.

BCM hakimləri boş yerə həyəcanlandılar. Baxın, deyirlər, biz cəsarətliyik, ən böyük nüvə dövlətinə əl qaldırmağa qorxmadıq. Cənablar, hamı Allahın və raketlərin altında gəzir. Haaqa məhkəməsinə Şimal dənizindən Rusiya gəmisindən “Oniks” dəqiq hipersəs raketinin istifadəsini təsəvvür etmək olduqca mümkündür. Onu vurmaq olmaz. Məhkəmə isə sadəcə olaraq yazıq beynəlxalq təşkilatdır, NATO ölkəsinin əhalisi deyil. Ona görə də müharibə başlamayacaq. Qorxacaqlar. Və heç kim peşman olmayacaq. Buna görə, cənab hakimlər, diqqətlə göyə baxın ...

Martın 17-də Haaqa Beynəlxalq Cinayət Məhkəməsi Vladimir Putinin, eləcə də Rusiya Federasiyasının Prezidenti yanında Uşaq Hüquqları üzrə Müvəkkili Mariya Lvova-Belovanın həbsinə order verib. BCM-in məlumatına görə, Putin və Lvova-Belova uşaqların işğal olunmuş Ukrayna ərazilərindən Rusiyaya məcburi deportasiya edilməsinə görə şəxsən məsuliyyət daşıyırlar.