Kreml Ukraynanın Çerniqov vilayətinin sərhədində və Moldovada saxta bayraq altında əməliyyatların keçirilməsinə şərait yaradır.
Bu barədə Müharibənin Tədqiqi İnstitutunun (ISW) hesabatında deyilir.
Analitiklər qeyd ediblər ki, fevralın 23-də “Şimal” Əməliyyat Komandanlığı Rusiya qoşunlarının Çerniqov vilayətinin sərhədyanı rayonlarında mümkün gizli əməliyyatlar hazırlaması barədə məlumat yayıb.
Ukrayna kəşfiyyatı artıq qeyd olunmamış hərbi texnika ilə RF ordusunun kolonnalarının və Ukraynaya oxşar forma geyinmiş şəxsi heyətin Çerniqov vilayətinin sərhəd bölgələrinə necə hərəkət etdiyini qeydə alıb.
Ukrayna hərbçiləri hesab edirlər ki, bu saxta bayraq altında əməliyyatların məqsədi Ukrayna qüvvələrinin digər ölkənin ərazi bütövlüyünü pozmaqda ittiham etmək cəhdidir, çox güman ki, söhbət Belarusdan gedir.
ISW Kremlin Belarusu müharibəyə cəlb etmək üçün saxta bayraq altında hücumları hazırladığını istisna etmir.
Analitiklər xatırladırlar ki, Belarus prezidenti Aleksandr Lukaşenko fevralın 16-da bəyan edib ki, Belarus yalnız Ukraynadan hücum olacağı təqdirdə müharibəyə qoşulacaq.
Belarus Müdafiə Nazirliyi də fevralın 21-də bildirib ki, ölkə qoşunları öz sərhədləri yaxınlığında Ukrayna qüvvələrinin yığılmasını müşahidə edib.
“ISW hesab edir ki, Belarus və ya Rusiyanın Ukraynanın şimal bölgələrinə hücum etməsinin ehtimalı azdır, bununla belə Rusiya Lukaşenkonu sıxışdırmağa və Kiyevə dəstəyi zəiflətmək üçün Ukraynanı müharibəni genişləndirməkdə ittiham etməyə çalışır”, - analitiklər yazırlar.
Onların fikrincə, bu cür saxta bayraq altında əməliyyat Ukraynanın şərqində müdafiəni zəiflətmək və əks-hücum əməliyyatlarını ləngitmək üçün həyata keçirilə bilər.
Fevralın 23-də Rusiya Müdafiə Nazirliyi Ukrayna qoşunlarının yaxın gələcəkdə Dnestryanıya qarşı silahlı təxribat törətməyi planlaşdırdığını açıqlayıb. Müdafiə Nazirliyi iddia edib ki, Ukrayna qüvvələri Rusiya hərbi formasını geyinib Dnestryanıdakı mövqelərdən Rusiyanın iddia edilən hücumu təşkil edəcək. Moldova hökuməti Rusiya Müdafiə Nazirliyinin ittihamlarını rədd edib.
