Şimali Koreya Donbasa hərbçilər göndərir

Şimali Koreya hökuməti ölkənin Rusiyadakı ticarət şirkətlərinə RF ordusunun işğal etdiyi ərazilərdə yenidənqurma işlərində iştirak etmək üçün öz personalının bir hissəsini Ukrayna ərazilərinə göndərməyi əmr edib. Bu barədə Cənubi Koreyanın Daily NK nəşri Rusiya Federasiyasındakı mənbəyə istinadən məlumat yayıb.

Jurnalistlərin məlumatına görə, KXDR Müdafiə Nazirliyi ilə əlaqəli olan “Cholhyon Construction” və “Kumrung Construction” şirkətləri də müvafiq əmri yanvarın 20-də alıblar.

Onlara tapşırılıb ki, 19-27 yaş arasında olan hərbçi və ya polis işçiləri seçsinlər. Onlar evli olmalıdırlar, lakin ailələrini Şimali Koreyada yaşamalıdır - hakimiyyət fərarilik hallarının qarşısını belə almağa ümid edir.

Ehtimal olunur ki, 300-500 nəfərlik KXDR vətəndaşlarının birinci qrupu fevralın ortalarında və ya martda Ukraynanın işğal olunmuş ərazilərinə gedəcək.

Nəşr yazır ki, sərəncamlarda Ukraynada Şimali Koreya hərbçilərinə hansı tapşırıqların veriləcəyi göstərilmir, lakin onların hərbi əməliyyatlarda iştirak etmələri ehtimalı azdır.

“Daily NK” qeyd edir ki, işğal olunmuş ərazilərə kadrların göndərilməsi KXDR-ə əlavə gəlir gətirəcək. Jurnalistlər bildirirlər ki, Şimali Koreyanın Ukraynadakı hərbçiləri Rusiyada ənənəvi olaraq maaş aldıqlarından üç dəfə çox qazanacaqlar. Eyni zamanda, hətta xaricdə olarkən dövlətdən sabit maaş alırlar və əldə etdikləri əlavə gəlir KXDR-in xəzinəsinə daxil olur.

Rusiyanın Ukraynaya müdaxiləsindən sonra Şimali Koreya Moskvanın mövqeyini dəstəkləyib. Pxenyan BMT-də Rusiyanı pisləyən qətnamələrin əleyhinə səs verib və eyni zamanda Ukrayna ərazilərinin ilhaq edildiyi “referendumların” nəticələrini rəsmən dəstəkləyən yeganə ölkə olub.

Yanvarın sonunda Şimali Koreya lideri Kim Çen Inın bacısı Kim E Çjon bəyan edib ki, Şimali Koreya “həmişə Rusiya ordusu və xalqı ilə eyni səngərdə olacaq”.

BÖLMƏNİN DİGƏR XƏBƏRLƏRİ