Gəncədə 16 yaşında ana olan qızla bağlı detallar ortaya çıxıb.
Buta.media-nın Lent.az-a istinadən xəbərinə görə, 16 yaşlı L.Ə. iki il qabaq 1993-cü il təvəllüdlü İbrahim Orucovla ailə həyatı qurub.
Ailə Gəncə şəhəri Adil Ziyadaxanov küçəsində yaşayıb.
Qonşuların və İbrahim Orucovun bacısı bildirib ki, L.Ə. onların qohumudur:
“Bu, qızın ikinci evliliyidir. İki il bundan qabaq evləniblər. Lakin o, ərə gələndə 18 yaşının olduğunu və şəxsiyyət vəsiqəsinin olmadığını deyib. Zahiri görkəmindən onun 18 yaşdan yuxarı olduğunu düşünmək olar. L.Ə. uşaq dünyaya gətirənədək onun 16 yaşı olduğunu bilməmişik”.
12:34
Bu gün Gəncə şəhərində 16 yaşlı qız ana olub.
Bua.media xəbər verir ki, Gəncə şəhər Perinatal Mərkəzin Baş həkimi Sevda Hüseynova jurnalistlərə açıqlamasında bildirib ki, həmin qız aprelin 9-u saat 04:42-də Perinatal Mərkəzə ağır vəziyyətdə, 40 həftəlik hamiləlik və üçüncü dərəcə piylənmə diaqnozu ilə daxil olub.
Baş həkim qeyd edib ki, daxil olarkən üzərində şəxsiyyət vəsiqəsi olmadığı üçün xəstə 2003-cü il təvəllüdü ilə qeydiyyatdan keçirilib: “Xəstənin vəziyyəti ağır olduğundan (arterial təzyiq, qusma) təcili əməliyyata götürülüb. Əməliyyat olunub 4 kq çəkidə və 52 sm boyda qız uşağı doğulub. Hazırda ana və yeni doğulan körpənin vəziyyəti kafidir. Əməliyyatdan sonra xəstə kompüter vasitəsilə qeydiyyatda alınarkən onun 2006-cı il təvəllüdlü olduğu görünüb. Məlum olub ki, xəstənin 15 yaşı var. Özü bilərəkdən təvəllüdünü gizlədib. Daha sonra xəstə haqqında polisə məlumat verilib”.
Sevda Hüseynovanın sözlərinə görə, o, Gəncə şəhər sakini olduğu halda doğuşu başa çatdırmaq üçün Samux Rayon Xəstəxanasına müraciət edib: “Xəstə bizə Samuxdan həkim müşayiəti ilə Gəncəyə gətirilib. Yəqin ki, yaşını gizlətmək üçün Samuxa müraciət olunub. Xanımın çəkisi 110 kq olub. Yaşının az olmasına baxmayaraq, zahiri görkəmində 15 yaş olduğu bilinmir. Ona görə də xəstəxanaya daxil olarkən biz onun azyaşlı olduğunu bilməmişik”.
Xatırladaq ki, ilkin məlumata görə, qız 2020-ci ildə 14 yaşı olan zamanı ailə həyatı qurub. Hazırda qeyd edilən məsələ ilə bağlı Gəncə Şəhər Baş Polis İdarəsində müvafiq araşdırmalara başlanılıb.
