Quba, Qusar, Xaçmaz rayonlarını kəpənək basıb. 

Buta.media-nın məlumatına görə, Sputnik Azərbaycan xəbər verir ki,Kənd Təsərrüfatı Nazirliyinin Meyvəçilik və Çayçılıq Elmi-Tədqiqat İnstitutunun mütəxəssisi Mədət Qurbanov məlumat verib.

O bildirib ki, hazırda rayonlarda müşahidə edilən kəpənəklər zərərverici "kənd ayıcıq kəpənəyi"-dir. Bu kəpənəklər ilk dəfə 1980 –ci ildə müşahidə edilib.

"Əsasən bu kəpənəklər yaz vaxtı müşahidə edilir. Kəpənəklər yumurta qoyandan sonra tırtıllar yaranır və bu tırtıllar meyvə bağları üçün təhlükəlidir. Tumurcuqları və yarpaqları yeyir. Belə kəpənəklər İrandan, dəniz istiqamətindən gələ bilər. Ola bilsin ki, hardasa bunun yayılma arealı olub, küləklər gətirib. Kəpənəklərin qarşısını almaq üçün müvafiq tədbirlər görülməlidir" – deyə Mədət Qurbanov bildirib.

Kənd Təsərrüfatı Nazirliyi yanında Aqrar Xidmətlər Agentliyi bu barədə məlumat yayaraq bildirib ki, son günlərdə ölkənin Quba-Xaçmaz, Şəki-Zaqatala bölgələrində, həmçinin Bakıda və Abşeron yarımadasında yayılmış kəpənəklərin heç bir zərəri yoxdur və əksinə, kənd təsərrüfatı üçün faydalı hesab olunur.

Qeyd olunub ki, şeytanqanqalı kəpənəyi adlandırılan və elmi adı Vanessa cardui olan bu kəpənəklərin bolluğu biomüxtəlifliyin zənginliyi, çiçəkli bitkilərin tozlanması, quşlar üçün isə yem ehtiyatıdır. Faydalı fitofaq olmaqla, əkin sahələri üçün  təhlükəli alaq otu hesab edilən qanqalın başlıca növlərinə qarşı bioloji mübarizə vasitəsidir.

Şeytanqanqalı kəpənəyi alaq oltlarında - qanqal, gicitkən, dəvətikanı, türpəng kimi bitkilərdə tırtıl qoyaraq çoxalır və həmin bitkilərlə qidalanır. Aprel-may aylarında ölkədə aparılmış monitorinqlər nəticəsində bu il taxıl və digər əkin sahələrində şeytanqanqalı kəpənəyi tırtılı yayılmış həmin alaq otlarının zəif inkişaf etdiyi müşahidə edilib. 

Şeytanqanqalı kəpənəyi ən çox Yaponiyada geniş yayılıb. Bəzi illərdə Rusiyada, Ukraynada, Belarusda, Moldovada, Zaqafqaziya və Qazaxıstanda çox təsadüf edilir. Türkiyənin bütün bölgələrində rastlanır. Kütləvi çoxaldığı illərdə birinci nəslin kəpənəklərinin aktiv miqrasiya etmək xüsusiyyətləri var. Kəpənəklərin may ayından oktyabr ayına qədər uçuşları müşahidə edilir. Yaz fəslində kəpənəklərin uçuşu cənubdan şimala, payızda isə şimaldan cənuba doğru istiqamətlənir. Azərbaycanda yayılma səbəbi də məhz bu miqrasiya yolunun üzərində olmasıdır.