ABŞ Dövlət Katibi Entoni Blinkenlə Azərbaycan prezidenti İlham Əliyev arasında telefon danışığı olub. Bu barədə ABŞ Dövlət Departamentinin sözçüsü Metyu Miller məlumat verib.

Bildirilib ki, Blinken bu gün Azərbaycan Prezidenti İlham Əliyevlə danışıb. Dövlət katibi Prezident Əliyevin Azərbaycan və Ermənistan arasında davamlı və layiqli sülh sazişi bağlamaq səylərini alqışlayıb. Katib uzun müddətdir davam edən bu münaqişədən həm azərbaycanlılar, həm də ermənilərin eyni dərəcədə əziyyət çəkdiyini etiraf edib və sülhün regionda hər kəsə gətirəcəyi faydaları vurğulayıb.

Dövlət Katibi Azərbaycanla davamlı əlaqələri müzakirə edib, münasibətlərdə son vaxtlar narahatlıq doğuran məqamları qeyd edib, həmçinin əməkdaşlığın gücləndirilməsi imkanlarından, xüsusilə sülh prosesi ətrafında, yüksək səviyyəli iştirakın vacibliyindən danışıb.