Azərbaycanda sürücülük vəsiqələrində qadınların hicabla fotolarının yerləşdirilməsinə qoyulan qadağanın ləğv edilməsi ilə bağlı məlumatlar yayılıb.

Sürücülük vəsiqələrində xanımların hicablı fotolarına olan qadağanın artıq götürüldüyü bildirilib.

Mövzu ilə bağlı Baş Dövlət Yol Polisi İdarəsinin inspektoru, polis leytenantı Elvin Hacıyev saytımızın sorğusuna cavab olaraq bildirib ki, mətbuatda yayılan məlumatlar həqiqətə uyğun deyil:

“Yayılan görüntüdən məlumatlıyıq. Bu barədə xidməti araşdırma başlanılıb. Araşdırmanın nəticəsindən asılı olaraq məsələyə hüquqi qiymət veriləcək”.

Qeyd edək ki, DİN məsələ ilə bağlı daha əvvəl də məlumat yayıb. Bildirilib ki, Azərbaycan Respublikasının müvafiq qanunlarına əsasən vətəndaşın fotoşəkli Beynəlxalq Mülki Aviasiya Təşkilatının tələblərinə uyğun formada pasportu verən orqanda çəkilir. 

Həmin təşkilatın 9303 nömrəli sənədində fotoşəkillərin yol verilən və yol verilməyən nümunələri göstərilib. Həmin sənədə əsasən fotoşəkil çəkilərkən üzün cizgiləri açıq vəziyyətdə olmalı və baş geyimlərindən, pariklərdən və digər vasitələrdən istifadəyə yol verilməməlidir. Həmin nümunələrdə fotoşəklin başörtüyü ilə çəkilməsinin yolverilməzliyi, lakin istisna hal kimi səlahiyyətli dövlət orqanları tərəfindən konkret nəzərdə tutulmuş halların olduğu da qeyd olunub.