Bakıda azyaşlının döyülməsi və zorakılığı əks etdirən görüntülər ictimailəşmişdi. Mağazanın kameralarına əks olunan görüntülərdə iki yeniyetmə azyaşlını vuraraq onu telefona çəkir və yerdə sürükləyir.
Hadisə Xətai rayonu S.Əhmədov küçəsində baş verib. Əməli törədən iki yeniyetmə rayon polis əməkdaşlarının nəzarətinə götürülüb. Zorakılığa məruz qalan uşaqla bağlı isə ekspertiza təyin edilib.
Olayla bağlı təhqiqat işləri bitməmiş zərərçəkənin ailəsi növbəti dəfə təzyiq və təhdidlərlə üzləşib. Azyaşlını döyən yeniyetmələrdən birinin valideynləri döyülən uşağın yaşadığı evə hücum edərək, şikayətlərini geri götürmələrini tələb edib. Bu azmış kimi görüntülərin çəkildiyi mağazanı bağlatdırıblar.
Bununla bağlı Bizim.Media-ya döyülən azyaşlının atası Ruzin Nəsirzadə şikayətlənib. Ata deyib ki, övladının zorakılığa məruz qalmasından sonra indi də ailəlikcə rahatlıqları pozulub:
“İki oğlum var. Böyük oğlum autizm xəstəsidir. Döyülən oğlum Yusifi ingilis və rus dilinə kursa, rəqsə qoymuşam. Biri xəstədi deyə, o uşağı yetişdirmək istəyirəm. Tır sürücüsüyəm. Çox vaxt yollarda oluram, alın zəhmətimlə çalışıram ki, ailəmin nədəsə çətinliyi olmasın, heç nəyə tamahları çəkməsin. Amma gəlib belə bir vəziyyəti görəndə bütün həyat gözümdə qaranlığa çevrilir. Bu il Yusif 3-cü sinfə gedəcək. Bu yaşda niyə travma yaşamalıdır ki? Axı biz onu elə böyütmürük? Ailəmlə 5 ildir ki, Xətai rayonu S.Əhmədov küçəsində kirayədə yaşayırıq. Maraqlana da bilərsiniz, heç kimlə problemimiz olmayıb. Amma həmin uşaqlar dəfələrlə oğlumun qarşısını kəsib, velosipedini əlindən alıblar, ona travma yaşadıblar. Bu dəfə isə uşağın başına, bədəninə xəsarətlər yetiriblər. Məhləmizdə cəmi iki oğlan var. Onlar da mənim oğlanlarımdır. Qalan hamısı qızdır. Hamısı yaşıd sayılırlar. Qızlar yığışıb marketə gediblər. Oğlum da onlarla qoşulub gedib ki, yanlarında olsun. Bir növ böyüklük edib. Marketin qarşısında oturub qızların çıxmasını gözləyib. Qızlar çölə çıxandan sonra uşağın döyüldüyünü görüblər və bizə də elə onlar xəbər ediblər. Marketə gedən qonşu qadınlar belə döyən uşaqların valideynlərini tanıdıqlarına görə qorxularından olaya müdaxilə etməyiblər”.
Ruzin Nəsirzadənin sözlərinə görə oğlunu döyənlərdən birinin valideyni üzrxahlıq etsə də, digərinin anası onlara təzyiq edərək şikayəti geri götürmələrini istəyir:
“Bacısı və anası evimə hücum edərək, “ərizəni geri götür, yoxsa sizin üçün yaxşı olmayacaq” deyə təhdid edirlər. Hüquq mühafizə orqanları da “biz onlara bata bilmirik, amma ölçü götürəcəyik deyirlər. Heç nə anlamıram. Belə çıxır ki, kim nə istəyir edəcək və cəzasız qalacaq?”.
Şikayətçi qeyd edib ki, zorakılığa məruz qalan oğlunun xəsarətləri ilə bağlı ekspertiza təyin olunsa da, nəticə barədə sənəd onlara təqdim olunmur:
“Ekspertizanıın nəticələrini bizə vermirlər. Deyirlər ki, polis gəlib götürməlidir. Qarşı tərəfin bizə təzyiq və təhdidindən həm Xətai rayon Polis Şöbəsinin 37-ci bölməsi, həm də Baş Prokurorluq məlumatlıdır. Təbii ki, oğlumu döyənlər də uşaqdır, 14-15 yaşları var.
Mən demirəm ki, həbs olunsunlar və ya həyatları məhv olsun. Heç olmasa valideynləri barədə tədbir görülsün. Özlərini güclü və arxalı göstərirlər. Təsəvvür edin ki, o hadisədən sonra oğlumun görüntülərini yayan mağazanı bağlatdırıblar. Övladımı döyməkləri bəs deyil, indi də rahatlığımızı pozurlar. Onlarla bacaran yoxdur”.
DİN-in Mətbuat Xidmətinin əməkdaşı, polis mayoru Anar Qafarov isə bildirib ki, polis əməkdaşları tərəfindən Xətai rayonu S.Əhmədov küçəsində baş vermiş hadisə üzrə əməli törədən azyaşlılar müəyyən olunublar. Zorakılığa məruz qalan uşaqla bağlı ekspertiza təyin edilib.
Ekspertiza rəyindən asılı olaraq əmələ hüquqi qiymət veriləcəkdir. Hazırda təhqiqat araşdırmaları davam etdirilir.
Hadisə zamanı zorakılığa məruz qalan azyaşlının valideynləri qarşı tərəfin onlara təzyiq göstərdiklərini iddia edirsə bu barədə də əlavə olaraq polisə müraciət edə bilərlər.
Xatırladaq ki, avqustun 2-də Xətai rayonu S. Əhmədov küçəsində 8 yaşlı oğlan 14-15 yaşlarında olan iki yeniyetmə tərəfindən zorakılığa məruz qalıb. Döyülmə faktı ərazidə yerləşən marketlərdən birinin kamerasına düşüb və sosial şəbəkələrdə yayılıb. Hazırda Xətai rayon Polis Şöbəsinin 37-ci bölməsində təhqiqat aparılır.
