“Əlbəttə ki, tənqidlərə cavabım var. Fikir verirsinizsə, mən hər şeyi daha çox susaraq  izləyirəm. Bu da səbəbsiz deyil, çünki  bu gün  15:25-də  İctimai TV-də bunu opponent bir nəfərlə müzakirə edəcəyik”.

Buta.media-nın məlumatına görə, bu sözləri “Yeni Sabah”a  Mətbuat Şurasının İdarə Heyətinin üzvü Azər Həsrət rus məktəblərində təhsil alanlarla bağlı statusuna görə onu tənqid və təhqir edənlərə fikrini bildirərkən deyib. 

O  qeyd edib ki, rus dilli kəsim  daha çox ona etiraz edib:

“Onlar həqiqətən də Azərbaycan dilinin incəliklərindən xəbərsiz olduqlarına görə, o statusu təhqir kimi qəbul ediblər. Əslində orada təhqiramiz heç nə yoxdur. Sadəcə olaraq bir fikir var və fikrin doğru və ya yanlış olub- olmadığı haqqında mübahisə və müzakirə açmaq mümkündür. 

İkincisi,onlar məndən izahat tələb etmək və ya hansısa formada fikirlərimi daha açıq öyrənmək əvəzinə  qızışdırmaqla məşğuldurlar. Xüsusən də rus dilli saytlarda  statusumun şəklini paylaşaraq  başlığı da belə qoyublar: “Azər Həsrət  rus dilliləri pozğun adlandırdı” təbii ki rus dilində yazıblar. O statusda pozğun deyə bir söz, hətta işarə belə yoxdur. Məqsədli şəkildə adamlar mənim adımdan yazırlar. Təbii ki, mən heç kimi pozğun adlandırmamışam”. 

A.Həsrət bir məsələyə çox təəssüfləndiyini vurğulayıb: 

“Sadəcə olaraq bir şeyə təəssüfləndim və təəccübləndim ki, axı bir qayda olaraq deyirlər ki,  rus dillilər daha intellektual və mədəni olurlar. Cəmiyyət içində illərdir belə fikri tirajlayırlar. Xüsusən də Azərbaycan dilli məktəblərin  aşağı səviyyəli olmasını  daha geniş yayırlar. Müqayisə edib deyirlər ki,  rus dillilər daha yüksək səviyyəlidir, onların mədəniyyəti yüksəkdir. Amma mənim statusumun altında yazılan rəylər, onun tirajlanması ilə başqa yerlərdə yazılan şərhlərə baxanda rus dillilərin heç də yüksək mədəniyyət sahibi olmadığını müşahidə edirəm. Təbii ki, söhbət bütün rus dillilərdən getmir, orada şərh yazanları deyirəm. 

Yəni təhqirin, küçə sözlərinin biri bir qəpik. Bunlar rus dilinin təəssübkeşləridir. Məni təəssüfləndirdilər. Düşünürdüm ki, onlar  orada şərhləri və mövqeləri ilə məni  utandırarlar. Çox nəzakətli və mədəni  münasibət bildirərək  məni çıxılmaz vəziyyətə salarlar.

Əksinə çox ədəbsiz şərhlər yazmaqla  göstərmiş oldular ki, əslində onlar  haqqında deyilən “yüksək intellekt sahibidirlər”  fikri yanlışdan  başqa bir şey deyil. Yenə deyirəm bu fikirlər hamıya aid deyil. Rus dilində təhsil alan örnəklərimiz də çoxdur. Sadəcə olaraq orada müzakirə açanların əksəriyyəti ədəb, əxlaq, mədəniyyət səviyyəsinin aşağı olduğunu sübut etmiş oldular”. 

Qeyd edək ki, Azər Həsrətin dünən “Facebook”da paylaşdığı status birmənalı qarşılanmayıb. Bir çoxları tərəfindən tənqidlərə və təhqirlərə səbəb olub.